Aizawl the 17th December, 2018:

Mizoram Chief Minister thar Pu Zoramthanga chuan vawiin khan a pisa Chief Minister's Office, McDonald's Hill, Zarkawt chu luahin, CM office staff-te leh amah tawiawmtute nen Pathian hnena lawmthu sawina hun an hmang.

Chief Minister chuan Pathian leh mipui zara dinhmun pawimawh tak luah theia a awm chu a lawm thu leh, ram hmasawnna atan theihtawp a chhuah tur thu a sawi a. Hmaih awm lova mitin in ram hmasawnna rah an chan theih nan ngaihtuahna thar nena hmalak a nih tur thu Pu Zoramthanga chuan sawiin, chumi atan chuan sawrkara thawktute zawng zawng leh mipui tawiawmna leh thawhhona a pawimawh thu a sawi.

Chief Minister hian Finance Department, Political and Cabinet, Planning & Programme Implementation, General Administration Department, Secretariat Administration Department, Vigilance Department, Public Works Department leh Horticulture Department te a enkawl dawn a ni. Vawiin office luah inkhawm hi Pu Lalram Thanga, Principal Secretary to CM chuan kaihruaiin, Rev. C. Lalsangliana'n hunserh a hmang a ni.